Spekulimet rreth menaxherit të Milanos, Carlo Ancelotti, nuk kanë të ndalur. Mediat britanike raportojnë se Carlito i ka thënë po ofertës së Chelseas për ta zëvendësuar holandezin Guus Hiddink, i cili në Stemford Brdige do të qëndrojë deri në fund të këtij kampionati. Tabloidi britanik The Sun shkruan se trajneri i Milanos i ka premtuar rusit Roman Abramovich se do të bashkohet me klubin londinez gjatë verës. Ancelotti ishte caku kryesor i pronarit të Chelseat për të zëvendësuar të shkarkuarin Felipe Scolari, por ishte e pamundur që ai të largohet nga Milano në mes të sezonit. Sidoqoftë, burime nga klubi italian kanë dhënë shenja se një marrëveshje është arritur me klubin anglez, e cila do ta shohë Ancelottin si trajnerin e ri. Kontrata raportohet të jetë tre vjeçare e vlefshme 5.8 milionë funte në sezon dhe duhet të nënshkruhet në qershor. Për trajnerin 52-vjeçar i interesuar është edhe kampioni i Spanjës, Real Madrid.